Kush Jemi Ne

Albion

Albion Bylykbashi

Përshëndetje. Unë jam Albion Bylykbashi, ideatori i projektit “Gjimnazistet.al” dhe njëkohësisht realizuesi i video-regjistrimeve të mësimeve të Matematikës dhe të Fizikës.

Kam lindur në maj të vitit 1992 dhe aktualisht jam student në vitin e fundit të ciklit “Master Shkencor” në degën e Inxhinierisë së Telekomunikacionit, në Universitetin Politeknik të Tiranës.

Edukimi: Në vitin 2006-2010 ndoqa studimet në gjimnazin “Naim Frashëri”, Durrës. Ishin katër vite, të cilat tani i gjykoj që kanë patur ndikim jashtëzakonisht të rëndësishëm në formimin tim të përgjithshëm.
Suksesi që arrita në olimpiadat e Fizikës të organizuara në dy vitet e fundit të gjimnazit dhe numri i lartë i pikëve të grumbulluara në procesin e “Maturës Shtetërore”, bënë që të vlerësohesha me çmimin “Krenaria e qytetit” nga Këshilli Bashkiak i qytetit të Durrësit.

Në vitin 2010, fillova studimet në degën e Inxhinierisë së Telekomunikacionit, një nga degët më të kërkuara dhe me perspektivë në ditët e sotme, brenda dhe jashtë vendit.
Në tetor të vitit 2014, u diplomova në këtë degë dhe fitova titullin “Bachelor në Inxhinieri Telekomunikacioni.” Diplomimi me një vit vonesë, më dha mundësinë jo vetëm të përmirësoja ndjeshëm disa nota dhë të vlerësohesha me notë maksimale nga komisioni i pedagogëve të Departamentit të Elektronikës dhe Telekomunikacionit në punimin tim të diplomës me temë “Principet e operimit të radarëve SSR dhe roli i tyre në kontrollin e trafikut ajror”, por edhe të fitoja një eksperiencë shumë të vlefshme pune në fushën e marketingut online, të njohur ndryshe si ‘web marketing’ ose ‘digital marketing’.
Në dhjetor 2014, nisa studimet në ciklin “Master Shkencor në Inxhinieri Telekomunikacioni”, studime të cilat pritet të përfundojnë në korrik ose në shtator të vitit 2016.

Trajnime: Gjithnjë i kam kushtuar rëndësi formimit tim të përgjithshëm. Në këtë drejtim, kam marrë pjesë në disa trajnime ndërkombëtare: “Youth Unemployment Reduction” (Shkup - Maqedoni), “Religiuos diversity” (Topola - Serbi), "Transparency International School on Integrity" (Vilnius - Lituani), "IT-driven Social Entrepreneurship" (Enschede - Hollandë).

Punësimi: Eksperienca në fushën e web marketing ishte padyshim një eksperiencë që më hapi një horizont tërësisht të panjohur. Lidhur me këtë fushë, lexoj vazhdimisht artikuj interesantë online dhe kur kam kohë të lirë, ndjek gjithashtu dhe kurse online në platformat coursera dhe edx. Të mësuarit online është padyshim një nga arritjet më të mëdha teknologjike të këtij shekulli.
Gjatë dy viteve të fundit, krahas impenjimeve universitare, jam angazhuar në organizimin e konsultimeve në lëndët e matematikës dhe fizikës për maturantët, si dhe në dy lëndë inxhinierike që ndërlidhen ngushtësisht me njohuritë matematike dhe ato fizike. Mësimdhënia është një nga pasionet e mia më të mëdha.

Prej muajit Shkurt 2016, së bashku me Eridin dhe Eltjanën kemi punuar fort për të konceptuar dhe implementuar “Gjimnazistet.al”.
Të studiojnë matematikën dhe fizikën sa herë që gjimnazistët ta kenë të nevojshme, të kenë akses nga shtëpia e tyre në shpjegimin e detajuar të të gjitha mësimeve dhe ushtrimeve në çdo ditë të vitit sipas programit shkollor, 24 orë/24, duke kursyer kohë dhe para… Ky është projekti “Gjimnazistet.al”

Erid

Erid Bejko

Përshëndetje. Unë jam Erid Bejko, drejtuesi teknik i projektit “Gjimnazistet.al”.

Pas përfundimit të shkollës së mesme “Naim Frashëri”, duke qenë i apasionuar pas kompjuterit dhe gjithçkaje në lidhje me të, në vitin 2010 vendosa të ndjek studimet në degën Inxhinieri Informatike pranë Universitetit Politeknik të Tiranës, duke përfunduar pas pesë viteve studim, ciklet Bachelor dhe Master i Shkencave.
Kjo degë më dha një përgatitje të gjithanshme jo vetëm në pjesën e zhvillimit software, por edhe në njohuri themelore të fushës së teknologjisë së informacionit. Fokusi im në këto studime ka qenë fusha e Inxhinierisë së Softit, duke qenë një fushë mjaft e gjerë dhe që vë maksimalisht në punë logjikën.
Për këtë arsye i kam kushtuar një vëmendje të vecantë certifikimit të njohurive të mia, duke mbrojtur deri më tani një certificate të njohur ndërkombëtarisht nga Microsoft në fushën e programimit në web. Duke filluar nga viti i parë i studimeve master e në vazhdim punoj si programues në një kompani të huaj të fokusuar në zhvillimin e aplikacioneve në rang global.

Kur Albioni më tregoi idenë e “Gjimnazistet.al”, iu përgjigja menjëherë pozitivisht ftesës së tij për të qënë pjesë e implementimit të këtij projekti. Jam shumë i lumtur që jam pjesë e një iniciative të tillë, e para e këtij lloji në Shqipëri dhe që do t’i ofrojë mundësi të gjithë gjimnazistëve të Shqipërisë mundësinë për të patur një formim solid në lëndën e matematikës dhe të fizikës, nga rehatia e shtëpisë së tyre.

Eltjana

Eltjana Plaku

Unë jam Eltjana Plaku, anëtarja e tretë e stafit të “Gjimnazistet.al”.

Roli im në këtë projekt konsiston në aspektin e marketingut dhe mbajtjes së një komunikimi të vazhdueshëm me gjimnazistët në rrjetet sociale dhe në postën tonë elektronike.

Njohja me Albionin dhe Eridin daton që në periudhën e gjimnazit pasi studionim të tre në shkollën “Naim Frashëri”, por kurrë nuk e kishim menduar që në të ardhmen do të bashkëpunonim të tre në një projekt të këtij lloji. Gjithsesi, jam e lumtur që do të jap dhe unë kontributin tim.

Pas gjimnazit ndoqa studimet në degën “Financë”, pranë Fakultetit të Ekonomisë në Universitetin e Tiranës dhe në tetor të vitit 2013, u diplomova në ciklin “Bachelor”. Deshira për të vazhduar ciklin e studimeve Master në një universitet jashtë vendit, bëri që fill pas mbarimit të studimeve 3-vjeçare të vihesha në kërkim të një pune, në mënyrë që në të ardhmen të mund të përballoja kostot e këtyre studimeve e njëkohësisht të fitoja eksperiencë profesionale në fushën e financës.
Që prej tetorit 2013 punoj në një studio kontabiliteti që ofron shërbime financiare për disa kompani të njohura italiane. Aktualisht, prej 12 muajsh punoj në këtë studio në pozicionin e përgjegjëses.

Përvec impenjimeve profesionale mundohem të mos lë pas dore zhvillimin tim personal, duke marrë pjesë në trajnime jashtë vendit (në Portugali rreth aftësive sipërmarrëse të të rinjve, në Serbi rreth diversitetit të besimeve fetare) dhe duke iu dedikuar në mënyrë autodidakte gjuhëve të huaja, për të cilat zotëroj certificatat ndërkombëtare në nivel të avancuar të gjuhës italiane (CELI 3) dhe të gjuhës angleze (TOEFL iBT).

Xhoana

Xhoana Bylykbashi

Unë jam Xhoana Bylykbashi.

Aktualisht studioj në vitin e tretë në degën “Matematikë” në Fakultetin e Shkencave të Natyrës, Universiteti i Tiranës. Në “Gjimnazistet.al” kam kontribuar duke ndihmuar Albionin në përzgjedhjen e ushtrimeve që më pas do të zgjidheshin e shpjegoheshin. Gjithashtu kam qënë shumë aktive në mbajtjen e komunikimit të vazhdueshëm me gjimnazistët me anë të emailit dhe faqes së projektit tonë në rrjetin social Facebook. Jam shumë e lumtur që kam qënë pjesë e këtij projekti që po ndihmon kaq shumë gjimnazistë nga Shqipëria e Kosova të mësojnë matematikën kurdo ata dëshirojnë, pa pagesë.